Katsina Times | Lahadi, 14 ga Satumba, 2025
Wasu mazauna unguwar Kofar Sauri a cikin birnin Katsina sun bayyana ƙorafi kan yadda aka biya su diyyar gidaje, shaguna da masallatai da aikin hanyar Kofar Sauri zuwa Kofar Soro ya shafa.
Sun bayyana wannan ƙorafi ne a taron manema labarai da suka kira a ranar Lahadi, kwana guda bayan Ma’aikatar Ƙasa da Tsare-tsare ta jihar ta raba cheken kuɗi ga wadanda abin ya shafa ta hannun kwamishina, Dakta Faisal Umar Kaita.
Da yake jawabi a madadin al’ummar, Umar Sanda Mashi ya ce:
“Mun yi farin ciki da aikin saboda zai kawo ci gaba a yankinmu. Amma diyya da aka bayar ba ta yi daidai da kimar gidaje da shagunan da za'a rusa ba. Abin da muka samu ma ba zai iya sayen sabon fili ba, balle sake gina gida, shago ko masallaci. Muna kira ga gwamnati ta sake duba wannan al’amari.”
Sauran shugabannin al’umma da suka yi magana sun haɗa da Sagir Suleman, Mannir Musa Kankia, Alhaji Buhari, Malama Rabi Muntari da Umar Danda, inda suka ce abin da aka biya bai dace da gaskiyar halin da suke ciki ba.
“Ba mu adawa da aikin gwamnati,” in ji Malama Rabi Muntari, “amma tsarin biyan diyya ya kamata ya kasance nagari da adalci, musamman idan ya shafi gidajen mutane da wuraren ibada.”
Kwamitin ya ce iyalai da dama sun shiga cikin rudani kan inda za su koma, yayin da ’yan kasuwa ke fargabar rasa sana’o’insu, alhali kuma aka rasa masallatai da dama.
Sun roƙi Gwamna Malam Dikko Umar Radda da ya hanzarta duba batun tare da tabbatar da biyan diyya cikin adalci domin ƙara gina amincewar jama’a da shirin raya ƙasa na gwamnati.
Rahotanni sun nuna cewa a ranar Asabar, 13 ga Satumba, Ma’aikatar Ƙasa da Tsare-tsare ta biya ₦1.565 biliyan ga mutane 376 da aikin hanyar Kofar Sauri–Babban Masallacin Juma’a–Kofar Soro ya shafa.
Kwamishina Dakta Faisal Umar Kaita ya ce a karkashin gwamnatin Malam Dikko Radda, an riga an kashe fiye da ₦7.6 biliyan wajen biyan diyya ga sama da mutane 5,000 a fadin jihar a cikin irin waɗannan ayyukan raya ƙasa.
Ya ce Gwamna Radda ya bayar da umarnin cewa duk wanda aikin ya shafa a biya shi diyya mai daidai da darajar wurinsa, domin ya samu damar sake matsuguni.
Aikin hanyar Kofar Sauri zuwa Kofar Soro na daga cikin hanyoyi 12 da gwamnatin Katsina ke fadada a karkashin shirin “Renew Katsina Project.”
Manufar aikin ita ce sauƙaƙa zirga-zirga da kuma buɗe sabbin hanyoyin kasuwanci a cikin birnin. Sai dai batun diyya ga waɗanda gine-ginensu ya shafa ya sake zama babban ƙalubale a tsakanin jama’a da gwamnati.
